Թարգմանչաց Տօն ՝ Էսաեան Լիկէոնի  մէջ

 

            Անցեալ շաբաթ 12 Նոյեմբերին Էսաեանի սան եւ սանուհիներ յիշատակեցին Ս. Մեսրոպ Մաշտոց, Ս. Սահակ Պարթեւ եւ թարգմանիչները։ Հանդէսը սկսաւ Սփիւռքահայ բանաստեղծ Ժագ Յակոբեանի «Միայն Մէկ Գիր» բանաստեղծութեան առաջին քառեակով, որպէսզի վերյիշենք, թէ Մեսրոպեան գիրի շնորհիւ է որ մենք եղանք ՝ «Լոյսէ երկիր, լոյսի երկիր»։

         Հայ մշակոյթի ամսուան ձօնուած յայտագիրը հարստացած էր երաժշտութեամբ, բանաստեղծութիւններով, արձակ գրութիւններով եւ տեսաերիզով մը։ Ունկնդրեցինք դաշնակով Նորա Էօզէրը, կիթառով եւ իր ձայնով Էտկար Իկիթեանը եւ վարժարանի երաժշտութեան ուսուցիչ Պր. Յակոբ Մամիկոնեանի երզեհոնի ընկերակցութեամբ ՝ Այլին Էօճալը։

         Արտասանուեցան բանաստեղծութիւններ։ Թ դասարանէն Նաիրի Պիւյիւքսիմքէշեան եւ Սեւան Աչըքպաշ արտասանեցին Սիամանթոյէն «Գիւտին Փառքը» եւ «Տեսիլքը»։ Իսկ Գրիշա Ավերեսեան արտասանեց Սիլվա Կապուտիկեանէ «Խօսք Իմ Որդւոյն» անուն բանաստեղծութիւնը։

         Հանդէսին խօսնակները Նաթալի Պարսամեան եւ Վարդան Թէրզեան ձայնեցին իրենց ընկեր եւ ընկերուհիներուն ԺԹ դարու յայտնի վիպագիր, ուսուցիչ Խաչատուր Աբովեանի հետեւեալ տողերով. «Ձեզի կ՚ըսեմ, ձեզի, հայոց նորահաս երիտասարդներ, ձեր անունին մեռնիմ, ձեր արեւուն մատա՛ղ, տասը լեզու սորվեցէ՛ք, ձեր լեզուն, ձեր հաւատքը ամուր պահեցէ՛ք»։ Յետոյ բեմ հրաւիրեցին ԺԱ դասարանէն աշակերտ եւ աշակերտուհիներ, որոնք արտասանական ներկայացում հրամցուցին ներկաներուն Վահան Թէքէեանէ եւ Սիպիլէ, ընկերակցութեամբ Արթին Արզումանի կիթառին։

         Հայ լեզուի եւ մշակոյթի մասին իրենց գաղափարներով արտայայտուեցան Թ դասարանի սանուհիներ ՝ Տիանա Քէմանէճի, Լեթիսիա Նաս, Ժագլին Ագայ եւ Սէլին Պապասըզ։ Յայտագրին մէջ նաեւ տեղ տրուեցաւ 440 թուականին վարչապետ Վահան Ամատունիի Մաշտոցի մարմնին թաղման պատմութեան։ Իսկ հանդէսին վերջաւորութեան դիտեցինք վարժարանի Հայ լեզուի եւ գրականութեան վաստակաւոր ուսուցչուհի Տքթ. Արմաւենի Միրօղլուի Հայաստանէ լուսանկարներով պատրաստած տեսաերիզ մը։ Լուսանկարներուն մասին տեղեկութիւն տուին ԺԱ դասարանի աշակերտ եւ աշակերտուհիներ։

         Վարժարանի տնօրենուհին Սաթենիկ Նշանն ալ իր խօսակցութեամբ յարգանքով խոնարհեցաւ մեր մշակոյթի հիմնադրին ու գործակիցներուն բարի յիշատակին առջեւ։